orzamentos

Lucía Santos considera especialmente grave que o goberno municipal presente uns orzamentos continuistas nun ano no que a normativa estatal permite destinar os aforros municipais a investimentos. O PP desaproveitou unha oportunidade excepcional para impulsar proxectos estratéxicos e mellorar os servizos públicos.

Lucía Santos destacou que os Orzamentos Municipais de 2025 son unha oportunidade perdida para Marín, acusando ao PP de presentar unhas contas continuistas que non abordan os problemas reais do municipio. A portavoz do BNG sinalou que Marín precisa políticas que respondan as necesidades da súa xente, non máis promesas baleiras.

As emendas presentadas polo BNG inclúen a mellora do transporte público, a creación de novos viais, o abastecemento de auga e saneamento en núcleos pendentes, a protección do medio ambiente, a posta en valor do patrimonio cultural e a creación dun punto limpo para a vila.

Desde o BNG, comprometémonos a seguir traballando incansablemente para defender os intereses e benestar da comunidade de Marín, esixindo unha xestión municipal que poña ás persoas no centro das súas políticas e decisións

O BNG lamenta profundamente a falta de investimento que contribuiría ao desenvolvemento e solución de deficiencias en Marín, destacando a falta de atención do Partido Popular aos desafíos locais.

O BNG presentou 8 emendas para asegurar que Marín conte cos recursos necesarios para o seu desenvolvemento.

Lucía Santos salienta que “a filosofía subxacente denota unha falta de xestión e un continuísmo que segue a inercia de anos anteriores”, sendo uns “orzamentos negativos para Marín, como xa se ven amosando con absoluta claridade ao longo destes 11 anos de goberno do PP, no que a nosa vila sofre un retroceso importante tanto na actividade económica como na grave perda de poboación.”

Santos afirma que os orzamentos reflicten a “falta de iniciativa política e dun proxecto global, serio e a longo prazo para impulsar o desenvolvemento social e económico de Marín. Limítase a cubrir as necesidades básicas, o cal resulta insuficiente.”