O BNG denuncia que os Orzamentos Municipais para 2025 son continuistas e incapaces de responder ás necesidades reais de Marín. Así o manifestou a portavoz nacionalista, Lucía Santos Omil, no Pleno do pasado xoves 12 de decembro, onde o documento económico, de preto de 18 millóns de euros, foi aprobado cos únicos votos do Partido Popular. O BNG votou en contra por considerar que estes orzamentos ignoran problemas estruturais como o devalo demográfico, o peche do comercio local e a falta de reforzo nos servizos públicos.

Lucía Santos destacou que Marín perdeu 1.663 habitantes desde 2011, pasando de 25.864 a 24.197 veciños e veciñas, un descenso que non ten precedentes na historia recente do municipio. A isto engádese a emigración de máis de 600 persoas no mesmo período. “Estamos ante unhas contas que non inclúen ningunha medida para frear esta situación. É unha demostración de que as políticas do PP están esgotadas e carecen de proxecto para o futuro de Marín”, afirmou. Ademais, denunciou o baixo nivel de execución orzamentaria, con só un 68,83% en 2023, o que deixou case 9 millóns e medio de euros sen gastar. “Como poden falar de rigor se nin sequera son capaces de cumprir os seus propios orzamentos?”, preguntou.

Outro dos puntos máis criticados foi a falta de cobertura das prazas vacantes no cadro de persoal municipal, con 23 postos sen cubrir, entre eles os de técnico deportivo e técnico cultural. A portavoz denunciou que o orzamento de 2025 non contempla novas convocatorias, e que o incremento do 1,4% na partida de persoal é insuficiente para compensar a inflación, o que implicará unha perda de poder adquisitivo para as persoas funcionarias. “O goberno local prometeu que 2025 sería o ano das novas contratacións, pero, unha vez máis, quedan en palabras,” afirmou Santos, quen tamén destacou que o concello continúa incumprindo o prazo legal de 30 días para o pago a provedores, advertido tanto pola Xunta como polo Ministerio de Facenda. Por outra banda, a situación do comercio local foi outro eixo central da intervención nacionalista: “Cada ano pechan máis negocios e non existe unha política eficaz que fomente a actividade económica. A única medida contemplada nos orzamentos é unha subvención de 4.000 euros para a asociación de comerciantes, unha cifra claramente insuficiente,” lamentou Lucía.

O BNG criticou a falta de participación cidadá na elaboración dos orzamentos, ao non consultarse á veciñanza nin aos colectivos sociais. Lucía Santos subliñou que Marín precisa unhas contas que afronten os retos actuais e futuros, con políticas claras para frear o devalo demográfico, revitalizar o comercio e mellorar os servizos públicos.