O BNG denuncia que, dende o ano 2020, as vivendas situadas na marxe dereita da PO-313, dirección Moaña, seguen sen servizo de auga e saneamento malia a súa demanda reiterada. Nese mesmo ano, o goberno municipal realizou un proxecto para dotar de auga o lugar de Coirados, aproveitando a construción dunha senda peonil, mais a obra só deu servizo ás vivendas situadas na marxe pola que discorre a senda, deixando fóra arredor de 30 casas na outra marxe.

En agosto de 2020, o BNG levou ao pleno municipal a petición da veciñanza para que se estendera o servizo de auga e saneamento ás vivendas afectadas, pero o goberno do Partido Popular ignorou esta demanda. Segundo Lucía Santos, voceira do BNG en Marín, estas familias levan décadas dependendo de recursos propios, como pozos e fosas sépticas, para cubrir as súas necesidades básicas. "A situación é insostible e inadmisíbel para os tempos que vivimos", destacou Santos.

Non foi até 2023 cando o goberno municipal anunciou a contratación dun proxecto técnico para dotar de servizo de auga e saneamento a un tramo dun quilómetro que beneficiaría a un pequeno núcleo de vivendas en Coirados. Porén, un ano despois do anuncio, a realidade para moitas familias segue sendo crítica: unhas 15 vivendas continúan sen acceso a auga potable, o que levou a que algunhas delas se vexan obrigadas a abandonar as súas casas.

"A traída veciñal que abastecía estas vivendas xa non é suficiente, e moitas delas non teñen espazo para pozos privados, polo que a única solución posíbel é a conexión ao servizo público", explica Santos. O BNG recalca que a situación destas familias, sen un servizo básico como é a auga, non pode seguir sendo ignorada.

Por todo isto, o BNG insta ao goberno municipal do PP a destinar de inmediato os recursos necesarios para iniciar canto antes as obras que garantan a dotación de servizos públicos a todas as vivendas afectadas en Coirados. "Non se pode permitir que esta veciñanza siga desamparada e sen unha solución clara e urxente a un problema que leva anos sen resolver", concluíu Lucía Santos.