O BNG apoia o paro de frota e o marisqueo
O Consello Comarcal do BNG do Morrazo acordou apoiar o paro da frota e do marisqueo a pé convocado pola Federación Galega de Confrarías para o vindeiro venres, 14 de maio, ás 12.00 horas do mediodía, en protesta pola imposición do novo regulamento de control da actividade por parte da Unión Europea.
Nesa xornada, cada confraría (ou confrarías, de xeito agrupado) realizarán concentracións de embarcacións pesqueiras, así como de mariñeiros e mariscadoras/es nas dársenas portuarias, momento en que se realizará unha pitada colectiva das embarcacións pesqueiras.
Para o BNG a aprobación do Regulamento de Control da Pesca no Parlamento Europeo é unha mostra máis o descoñecimento e lonxanía que ten a UE do sector pesqueiro galego, con decisións que supoñen un agravio para a nosa frota, alonxadas da realidade do sector e desproporcionadas. Para o BNG, os Gobernos non defenden ao sector galego en Bruxelas, pois debían de terse anticipado a unha regulación que supón na práctica sumar perxuizos aos que xa sofre a frota galega, no reparto de cuotas e TACs.
Dende o BNG consideramos que a obligatoriedade de que se lle vaia a esixir ao segmento de frota artesanal o diario electrónico a bordo e a súa transmisión, é na práctica algo moi gravoso para a pesca e o marisqueo, porque supón unha carga desproporcionada para os barcos e a súa capacidade de faenar. Chamamos a unha revisión, para que o Goberno Galego e o Goberno do Estado esixan en Bruxelas que a presentación dos datos de capturas en formato impreso poida seguir sendo posible, como alternativa, para os buques pesqueiros de eslora total inferior a 12 metros e que Galiza exerza as súas competencias proprias en materia pesqueira rexeitando esta imposición.
O Bloque lembra que dende que foi presentada a proposta da Comisión Europea criticou duramente a proposta do diario electrónico para a pesca artesanal, a xeolocalización e a de instalación de cámaras nas embarcacións para controlar a obriga do desembarque das capturas. O BNG manifesta a súa oposición á videovixilancia, considerándoa unha medida excesivamente invasiva pois na UE están máis preocupados en lexislar que en saber como son as condicións de traballo dun sector tan duro como o pesqueiro”
Non máis imposicións dende a UE de máis trámites administrativos aos mariñeiros nin de medidas que son alleas a realidade do sector pesqueiro galego!
Retirada inmediata da proposta de modificación do Regulamento de Control da Pesca CE Nº 1224/2009!
