Este pasado luns celebrouse unha xuntanza da Mesa Local de Comercio na que a Portavoz Municipal do BNG, Lucía Santos, trasladou unha serie de puntos en relación á problemática que está afectando á veciñanza de Seixo e a súa actividade comercial.

O comercio de Seixo e Ardán atópase nunha situación realmente preocupante tras a decisión de Abanca de pechar a única oficina bancaria no núcleo de Seixo, afectando en consecuencia á actividade comercial da zona. Por unha banda a veciñanza de Seixo e das parroquias próximas atópase na obriga de ter que desprazarse a Marín ou Bueu para realizar as xestións bancarias, polo que aproveita para facer alí as súas compras. E por outra banda, os propios comerciantes teñen que desprazarse para facer calquera trámite bancario relacionado coa actividade comercial.

Segundo manifesta Lucía Santos, “a actuación que está levando a cabo Abanca resulta tremendamente indignante xa que despois de anunciar case 140 millóns de euros en beneficios tan só no primeiro trimestre deste ano, aumentan as comisións por servizos que teñen que realizar os propios usuarios e aínda por riba deciden pechar sucursais ao longo do país deixando a moita veciñanza de zonas do rural sen servizo bancario.”

É por isto que a Portavoz do BNG solicitou novamente á alcaldesa de Marín, a Sra. María Ramallo, a anular as contas municipais con Abanca e trasladalas a outra entidade bancaria.

Ademais, Lucía Santos propuxo ao goberno local non aceptar a colocación dun caixeiro de Abanca que estea financiado con cartos públicos, pois “é inadmisíbel que a actitude da entidade bancaria de desprezo á veciñanza resulte premiada con subvencións. A Xunta debería poñerse de lado das veciñas e dos veciños que vén recortados os seus servizos e non destinar nin un só euro máis a colaborar co desmantelamento dos servizos bancarios.”

A Portavoz local do BNG continúa afirmando que “a estas alturas todos e todas sabemos cales son as preocupacións do PP, e non son outras que gobernar para favorecer os intereses dos consellos de administración dos bancos. Non hai máis que lembrar o acontecido en Galiza nos últimos anos, cando o PP entregou as caixas galegas ao sector privado, como se rescatou Novagalicia Banco con diñeiro público para regalalo ao sector privado, e agora vemos como o PP premia o peche de entidades bancarias, o aumento de comisións abusivas e a redución de servizos de Abanca con subvencións para instalar caixeiros automáticos alí onde fechan oficinas. Unha absoluta tomadura de pelo á cidadanía galega”.

A portavoz do BNG tamén propuxo que o goberno municipal leve a cabo unha toma de contactos con entidades financieiras que estean interesadas en abrir unha sucursal en Seixo. Con iso, os establecementos comerciais terían de novo a facilidade para levar a cabo as súas xestións financieiras ademais de dar servizo á veciñanza de Seixo, Ardán ou Santomé e así servir como dinamizador comercial de Seixo.