Como ben sabemos, o PXOM de Marín foi aprobado no 2012, tras 19 anos de traballo para a súa elaboración, mais durante os 11 anos transcurridos, o goberno municipal do PP amosou claramente a súa incompetencia para levar a cabo o seu desenrolo, entre outras cousas, pola falta de plans específicos que resultan obrigatorios para a súa aplicación.

A inacción do goberno local do PP ante un tema de tal importancia para o desenvolvemento da nosa vila está acarreando graves consecuencias para Marín, como a nula construción de nova vivenda na última década ou a ininterrumpida e alarmante perda de poboación durante os últimos doce anos.

Lucía Santos, portavoz municipal do BNG, manifesta que “o goberno de María Ramallo aínda ten pendente a elaboración do Plan Especial de Protección para os Cascos Antigos, preceptivo tras a aprobación do PXOM e solicitado, ante a inacción do goberno popular, polo BNG no ano 2018 nunha moción aprobada por unanimidade.”

O BNG voltou manifestar no pasado mes de novembro que a falta deste plan afecta negativamente a boa parte do núcleo da vila e a zona de Cantodarea, xa que para calquera tipo de obra é necesaria a autorización da Dirección Xeral de Patrimonio, o que está provocando longas esperas para poder realizar a máis mínima obra nun inmoble.

Asimesmo, Santos indica que “resulta necesaria a elaboración do Catálogo de Hórreos do concello, o que faría que as licenzas de obra nos núcleos de vivenda no rural afectadas pola existencia dalgún hórreo, feito moi habitual nestes núcleos, sexan xestionadas directamente dende o concello e non dende a Dirección Xeral de Patrimonio como está acontecendo na actualidade, con todos os inconvenientes e demoras que isto supón.”

É por isto, que o BNG ven de presentar unha moción na que solicita ao goberno municipal o desenrolo do Catálogo de Hórreos do concello de Marín para facilitar a construción de nova vivenda nos núcleos do rural.

Mentres se leve a cabo a redación deste catálogo, a voceira do BNG insta ao goberno local “a levar a cabo a necesaria revisión do PXOM para adaptar a normativa á lei 2/2016 do solo de Galiza, da Consellería de Medio Ambiente e Ordenación do Territorio, que, entre outras cousas, reduce o espazo de afección de cada hórreo de 50 a 30 metros de franxa de protección. Cómpre actualizar o PXOM ás novas leis aprobadas con posterioridade a súa entrada en vigor.”

Lucía Santos expón que “a pasividade manifesta do PP nestes doce anos de goberno levou ao noso concello a encabezar os concellos de máis de 20.000 habitantes con perda de poboación, cunhas cifras a todas luces alarmantes (Marín perdeu 1.963 habitantes nestes 12 anos, un 7,55% da poboación), nun contexto no que a práctica totalidade dos concellos da contorna gañan poboación.”

A portavoz municipal do BNG asegura que “Marín precisa un proxecto de futuro, cun modelo urbano definido e moderno, e para isto é preciso o desenrolo do PXOM para facilitar a rehabilitación de inmobles, a construción de nova vivenda e a expansión do núcleo urbano de Marín.”