O pasado sábado 4 de novembro, como consecuencia dos continuos temporais que vimos padecendo nas últimas semanas, coñecemos a nova da caída unha árbore na barriada de San Pedro, que nesta ocasión causou danos a unha furgoneta que se atopaba nese lugar e rompeu o tendido eléctrico desa zona, deixando sen luz durante dous días a varias rúas da contorna.

A portavoz municipal do BNG, Lucía Santos, trasladou ao goberno municipal en diversas ocasións a necesidade dunha intervención urxente no arborado na Barriada de San Pedro, dado que levan anos sen ser podados e limpados.

Lucía Santos comenta que xa caeron pólas das árbores noutras ocasións sobre o tendido eléctrico, debido ao gran peso que soportan pola falta de mantemento.

Sumado a isto, o perigo que teñen estas árbores é que se sitúan en lugares de tránsito para a veciñanza, ao carón das vivendas, do parque infantil, da pista de deportes, da escola infantil ou dos aparcamentos, o que pode supoñer lamentar danos persoais.

O BNG insiste na necesidade de facer unha poda inmediata xa que estas árbores supoñen un risco para a seguridade da veciñanza de San Pedro e lamentan que o goberno do PP non atendera ás demandas da cidadanía, que xa presentou dúas peticións trasladadas polo BNG con anterioridade.