Nestes tres últimos anos, especialmente nos últimos meses, proliferan os proxectos de parques eólicos ao longo de todo o País convertíndose nunha grave ameaza sen precedentes para o territorio galego no que únicamente saen beneficiadas as empresas eléctricas co beneplácito do goberno do PP da Xunta, que leva 12 anos facendo mudanzas normativas para levar a cabo a construcción de parques eólicos sen control.

Neste momento hai máis de 300 parques eólicos proxectados na nosa comunidade e durante o último ano foron coñecéndose propostas en múltiples concellos da nosa contorna: Poio, Pontevedra, Barro, Meis, Forcarei, A Estrada, Campolameiro, Beariz, ou Cerdedo- Cotobade onde tan só neste último hai proxectado até 14 plans!

O Morrazo celebraba a mediados do mes de outubro a renuncia da empresa italiana Enel Green Power para a construcción do parque eólico no lugar de Pedras Negras, pero poucos días despois volvían os rumores de novos proxectos para o Morrazo promovido pola empresa ARATEL que afectaría aos montes de Marín e Moaña.

O BNG considera que a instalación de parques eólicos nos montes da comarca acarrearía consecuencias desastrosas poñendo en perigo acuíferos dos que se subministran os concellos de Marín e Moaña e a destrucción dunha zona de alto valor paisaxístico e ambiental, ademais do impacto negativo na saúde da veciñanza e a perda de valor económico dos terreos e vivendas da contorna.

Polo que o BNG trasladou a pleno municipal a moción presentada no pasado mes de decembro, na que se solicitaba o rexeitamento á instalación de parques eólicos nos montes do Morrazo, instando á Xunta a crear un novo marco regulador do sector eólico que incremente as garantías sociais, económicas e medioambientais cun novo Plan Sectorial Eólico.

O PP despois de bloquear o debate desta moción no pasado mes de decembro alegando non poder posicionarse ante a falta de proxecto, presentou unha enmenda de substitución solicitando o rexeitamento a instalación de parques eólicos no Monte Xaxán e Monte San Lourenzo pero deixando a porta aberta a apoiar novas ubicación no Morrazo e negando o apoio do goberno municipal á Plataforma “Eólicos no Morrazo Non”.

Por todo isto, o BNG rexeitou aceptar a enmenda xa que según manifesta a súa portavoz municipal, Lucía Santos, “o PP xoga a confundir á cidadanía e poder saír airosos da situación, intentando evitar o debate sobre o Plan Sectorial Eólico, impulsado polo goberno do PP da Xunta, que é quen dá luz verde ás empresas eléctricas a encher o país de macroeólicos que nin crean emprego nin deixan riqueza, ao contrario, espolian o noso patrimonio medioambiental.”

Finalmente, o PP non apoiou esta moción sendo lamentábelmente Marín polo momento, o único concello do Morrazo que non rexeita a instalación de parques eólicos nos nosos montes. A portavoz municipal do BNG manifesta que “isto vén a demostrar a total e absoluta incoherencia do PP ante esta problemática, decidindo o seu voto según lles convén, xa que no concello de Moaña o PP abstívose na votación desta mesma moción e no de Cangas votou a favor. María Ramallo e a súa equipa de goberno volve a dar as costas ás reivindicacións veciñais negando o apoio á Plataforma veciñal Eólicos no Morrazo Non.”

No pasado mes de decembro, o goberno municipal do PP evitou o debate da instalación de parques eólicos porque dicían non poder posicionarse ao non ter un proxecto, un mes despois sigue sen haber proxecto presentado, xa que o único que hai é unha consulta de parcelas pero nada mais, polo que a situación é a mesma que en decembro o que demostra que o PP mentía no seu argumento.

No pleno de onte, o goberno de María Ramallo antepuxo os seus intereses partidistas por riba do benestar da súa veciñanza, evitando posicionarse contra o Plan Sectorial Eólico impulsado polo goberno da Xunta que promove o boom eólico e depredador que ameaza a centos de concellos galegos, entre eles Marín, desenvolvendo unha expansión eólica sen planificación nin control público.