No pasado pleno municipal do 12 de setembro, o concelleiro do BNG en Marín, Tino Iglesias, fixo pública unha denuncia pola intervención inadecuada levada a cabo durante as obras de saneamento no río Lameira. Segundo o concelleiro, a actuación afectou gravemente a un elemento fundamental do patrimonio etnográfico da vila: a canle de subministro de auga do muíño do Sequelo, unha infraestrutura tradicional que foi substituída por unha de formigón. Esta canle, de aproximadamente 25 metros de lonxitude, forma parte dun conxunto histórico catalogado no Plan Xeral de Ordenación Municipal (PXOM) co código M2, correspondente ao Muíño número 2 do río Lameira.

Tino Iglesias considera que esta substitución, realizada sen respectar os criterios de conservación establecidos para bens patrimoniais, constitúe unha verdadeira aberración. A intervención non só desvirtúa o valor histórico e cultural do muíño, senón que tamén representa unha perda no conxunto de elementos etnográficos que enriquecen o noso territorio. "O uso do formigón nunha estrutura tradicional é un despropósito que atenta contra o noso patrimonio", afirmou Iglesias, subliñando que este tipo de accións non deberían contar co visto bo nin do Concello de Marín nin de Patrimonio da Xunta de Galicia.

O muíño do Sequelo é un exemplo representativo dos moitos muíños de auga que forman parte do patrimonio cultural galego. Estes muíños non só son testemuña da historia económica e social do noso país, senón que tamén constitúen un valor paisaxístico e cultural que debe ser protexido e posto en valor polas administracións públicas. Neste sentido, Iglesias lembrou que tanto o Concello de Marín como A Xunta teñen o deber legal de garantir a conservación e restauración dos bens patrimoniais, así como promover o seu coñecemento e a súa valorización entre a cidadanía.

"A intervención no muíño é unha mostra de desleixo por parte do goberno local, que non está cumprindo coa súa responsabilidade na protección do noso patrimonio", destacou o concelleiro. Ante esta situación, o BNG esixe que o Concello de Marín rectifique de inmediato a actuación realizada e proceda á reposición da canle con materiais que respecten a súa natureza orixinal. Ademais, solicitan que se realicen os trámites necesarios para que futuras intervencións deste tipo sexan controladas de xeito rigoroso, garantindo o respecto pola integridade dos bens patrimoniais do municipio.