O BNG de Marín continúa coa rolda de contactos con concellos gobernados polo BNG visitando nesta ocasión o concello ourensán de Allariz, un referente en todo o país pola tranformación que dende o ano 1989 levan desenrolando diferentes corporacións do BNG. Iniciativas como a rehabilitación do casco histórico e a posta en valor dos recursos naturais serviron de impulso para a revitalización da vila alaricana.

A esta xuntanza asistiron a portavoz municipal do BNG e candidata á alcaldía, Lucía Santos xunto a José Souto e Tino Iglesias, membros da candidatura para as vindeiras eleccións municipais, que se reuniron con María Cristina Cid Fernández (Alcaldesa e Concelleira de Urbanismo e Obras, Facenda e Policía Local); Bernardo Varela López (1º Tenente de Alcaldía e Concelleiro de Medioambiente); María Elena Suárez Estévez (2ª Tenente de Alcaldía e Concelleira de Servizos Municipais: Infraestruturas Deportivas, Alumeado Público e Transporte) e con María López Rodríguez (Concelleira de Promoción Económica, Turismo e Comercio).

Ao longo dunha intensa xornada de traballo os representantes do BNG mantiveron diversas reunións cos responsables das principáis áreas de Concello de Allariz, analizando en profundidade as diferentes actuacións que o goberno de Allariz vén desenrolando por unha firme aposta na dinamización económica local, a recuperación de espazos verdes e de lecer, a recuperación do patrimonio etnográfico e a rehabilitación do casco histórico (na actualidade xa levan acadado máis do 90% de edificacións rehabilitadas). Tomamos nota de moitas iniciativas para a súa implementación futura en Marín.

Froito dese intenso traballo de tres décadas Allariz é unha vila mundialmente coñecida como unha das xoias galegas, o seu Festival Internacional de Xardíns, por convertirse na capital dos outlets galegos (na vila desenrolan a súa actividade as principais firmas de moda, calzado e complementos galegas), etc.. Froito dese esforzo colectivo a vila foi galardonada co Premio Europeo de Urbanismo.

Igualmente, Lucía Santos manifesta que “analizamos e confrontamos ideas sobre políticas de xestión medioambiental, promoción económica, turismo, comercio, cultura, transporte municipal, sistemas de control e seguimento das concesións municipais,…”

A voceira do BNG indica que “Allariz é unha clara mostra de cómo con vontade, os gobernos municipais sí teñen a capacidade de desenrolar medidas para impulsar actividades económicas, apostando pola identidade dun pobo e poñendo en valor os recursos locais (patrimonio arquitectónico, natural, etnográfico, histórico e cultural) para crear unha sinerxia de impulso da economía local”. Este é un dos principais obxectivos cos que nos presentamos as vindeiras eleccións municipais porque Marín Merece Máis!.