No inicio da pandemia da COVID-19, a Xunta tomou a decisión de reducir drásticamente a asistencia presencial, o peche de consultorios, restrinxir consultas, probas diagnósticas e intervencións quirúrxicas nos hospitais. A decisión que tomou o SERGAS foi apostar preferentemente pola consulta telefónica.

As consecuencias son desastrosas e dous anos despois do inicio da pandemia a situación da atención sanitaria é lamentábel. Falta de persoal, servizo de pediatría saturado, longas listas de espera para fisioterapia ou dentista e o desmantelamento progresivo do Centro de saúde de Seixo, son algúns dos exemplos de como a Xunta de Galiza vai castigando á veciñanza coa excusa da COVID.

Feijoo leva 12 anos recortando e privatizando servizos na sanidade pública e este é o resultado. Marín non é un caso aillado, Moaña, Cangas, Sanxenxo, Vigo, Tomiño ou Lalín súmanse á lista de concellos afectados polos recortes na sanidade pública. A situación da atención primaria é o resultado da política do PP que só busca desmantelar a sanidade pública para beneficiar á privada xogando con algo tan importante como é a nosa saúde.

Após o traballo do BNG nas institucións locais e autonómicas, dende o BNG denunciamos o desmantelamento da sanidade pública co único obxectivo de favorecer á sanidade privada, folla de ruta do Partido Popular na Xunta de Galiza, e sumaremos forzas co conxunto da veciñanza, na xornada de loita que percorrerá as rúas de Marín, como facemos no conxunto do país como integrantes da Plataforma SOS Sanidade Pública.