Coa presencia do candidato Pablo Caracedo "Jasper", a portavoz municipal Lucia Santos, o tamén candidato Pedro Cortegoso e a presentación de Samu Acuña, celebrouse en Seixo o mitin de campaña do BNG.

Agradecemos ás numerosas persoas que asistiron a escoitar as nosas propostas, así como o comportamento respetuoso das normas de seguridade nestes tempos de pandemia.

Comprobamos con ilusión como cada vez máis xente se achega ao BNG e como cada vez está mais preto o cambio galego en Galiza.

Consideramos que a proposta de ordenanza reguladora do estacionamento parte dun enfoque equivocado e non incide no problema real que temos en Marín. Os problemas de tráfico e aparcamento veñen motivados pola falla dun deseño dos espazos urbanos da nosa vila que non ten en conta a prioridade fundamental que son as persoas.

Estamos ante unha nova improvisación por parte do goberno municipal que carece dun modelo para o noso concello. Hoxe necesitamos que Marín deixe atrás propostas e modelos urbanos do século XX e se incorpore ao século XXI.

A tendencia en Europa pasa por asumir que as persoas son a prioridade, e por actuacións encamiñadas á humanización das rúas. Esta é a premisa que move as propostas de planificación en cidades e vilas que queren un entorno mellor.

E non temos que ir moi lonxe para ver os resultados positivos destas actuacións, o exemplo témolo á nosa beira, na cidade de Pontevedra, recoñecida internacionalmente como cidade modelo, implantando a zona 30 onde levan anos sen sufrir accidentes. 

Marín necesita mais rúas peonís, Marín necesita humanizar as rúas, necesitamos dar solucións integrais aos problemas e non improvisar solucións parciais.

Se temos moitos coches parados ocupando un espazo público no centro da vila durante moito tempo o que non podemos facer e poñer todos eses coches en movemento, a dar voltas cada 60 minutos para buscar un novo aparcamento. Isto vai provocar unha maior densidade do tráfico e polo tanto un incremento dos niveis de contaminación do aire, conseguindo así o efecto contrario ao que se pretende na argumentación desta ordenanza.

En canto á dinamización da economía comercial da vila, entendemos que este obxectivo non se vai acadar na medida en que esta proposta de limitar o estacionamento a 60 minutos non é realista. Nese espazo de tempo é imposíbel facer unhas mínimas xestións, facer compras ou ir a un local de hostalería. Para potenciar o comercio é preciso mellorar a súa contorna, e isto non só se limita a ampliar rúas… Precisamos crear zonas peonís e facer de Marín un lugar mais atractivo e cómodo.

Tentar dinamizar a economía local incidindo unicamente nunha regulación dunhas determinadas zonas de aparcamento non é a solución máis acaida. Pola contra entendemos que vai provocar o efecto contrario, vai facer que as persoas que viñan  das parroquias á vila opten por facer as súas compras e xestións nos concellos limítrofes de Bueu e Pontevedra.

A dinamización do comercio e da hostalería local pasa por outro tipo de medidas. Por facer mais atractivos e cómodos os entorno urbanos, tanto en Marín coma en Seixo, por ter unha axenda de actividades lúdico-culturais estábel que sexa un polo de atracción, en definitiva por face atractivos os núcleos de Marín e Seixo.

Botamos en falta na presentación desta ordenanza os estudos pertinentes para facer esta proposta. Non constan informes Técnicos que avalen que o proxecto de Zona Azul sirva como revulsivo da economía local do Concello.  Onde está o Informe dos Técnicos da Concellaría de Comercio (Turismo, Dinamización, Parques e Xardíns e Cemiterios) que aposten por esta medida?

ALEGACIÓNS:

1. O comercio local ten un problema estrutural que non se resolve coa creación de zona azul. En vez de analizar cal é o problema fundamental do noso comercio, o que se procura é unha solución que a priori non vai resolver os problemas que afectan a este sector económico.

 2. Limitar o tempo a 60 minutos, e polo tanto crear un novo problema que hoxe non existía, vai provocar un efecto de fuxida a concellos limítrofes para realizar compras e xestións. Non podemos obviar a oferta que ofrecen concellos como Pontevedra con amplas zonas de aparcamento disuasorio e centros comerciais. Polo tanto a implantación da Zona Azul pode provocar un efecto nocivo para o comercio e a hostalaría de Marín.

 3. A implantación da Zona Azul obrigará a que os usuarios que usan habitualmente esa zona de aparcadoiro, tanto as persoas residentes en Marín como as que veñen traballar desde outros concellos, procuren outras zonas onde aparcar o coche levando o problema a outros lugares.

4. A proposta do Goberno Municipal non vai acompañada da creación de novas zonas de aparcamento disuasorio, polo que castiga aos veciños da vila de Marín que non teñen onde aparcar por carecer  de praza de garaxe, hai que ter en conta que moitas edificacións carecen deste tipo de instalacións.

5. A proposta de construción do novo Auditorio vai facer desaparecer aínda máis zonas de aparcamento, pois aínda que é certo que recolle un aparcadoiro no mesmo, as prazas que ofertan son menores das que se van destruír no lugar (unhas 80 aproximadamente).

 6. En vez de crear zonas novas de aparcadoiros disuasorios con esta iniciativa o que se fai é modificar o status de zonas xa existentes, polo que non se incrementa a capacidade. Isto vai provocar un incremento do tráfico de axitación coa conseguinte repercusión negativa no medio ambiente e no nivel de ruído.

  7. O control por parte da Policía Local de Marín do cumprimento desta ordenanza vai implicar unha maior carga de traballo para este corpo, provocando unha desatención doutros servizos e actuacións que se viñan prestando até hoxe.

Por todo o anteriormente exposto, solicitamos a retirada da proposta de ordenanza municipal así como se leve a cabo a búsqueda de nova localizacións para aparcamentos disuasorios.

Que o concello de Marín participe no Plan Ágora da Deputación de Pontevedra para a creación de espazos públicos destinados ao movemento das persoas.

A portavoz nacional e candidata á Presidencia, Ana Pontón, aproveitou o acto de Rianxo para pedir unha mobilización masiva nas urnas capaz deixar atrás a Galiza “minguante” que nos deixan once anos de goberno do PP e abrir un tempo novo cun goberno de país capaz de facer valer os intereses de Galiza, algo que só é posible baixo o liderado do BNG.

“Galiza precisa, dunha vez por todas, un goberno que faga valer os seus intereses, que non ese achante, que non se subordine e quen non diga si bwana ante a discriminación que ven de Madrid ou que ven de Bruxelas. E aquí, en Rianxo, no corazón da Ría de Arousa-Barbanza, -a máis produtiva do mundo-, a defensa do país é a defensa do sector pesqueiro e marisqueiro, a defensa do país e ter capacidade de decidir sobre o noso mar, sobre as nosas rías, porque Galiza é unha nación pesqueira por moito que en Madrid e en Bruxelas non se entesaren aínda”, saliento no acto con militantes e simpatizantes.

“Non se pode decidir sobre o noso mar, sobre as nosas rías nun despacho de Madrid, nin de Bruxelas, temos que decidir desde aquí, e ese é o meu compromiso se a partir do 12X se teño a responsabilidade de liderar o Goberno: converter o sector pesqueiro e marisqueiro nun eixo prioritario da actuación política e estaremos á altura como estivo a veciñanza de Rianxo e da comarca mobilizándovos contra o megraproxecto da mina de Touro, saíndo a rúa e dando a cara para salvar esta ría”, alegou.

Tras destacar que da pesca e do marisqueo viven, directamente ou indirectamente, 120.000 galegos e galegas., Pontón avanzou algunhas das medidas de goberno a favor deste sector, fronte a un PP que consente as medidas impostas para reducir actividade, para reducir cotas e para despezar barcos, e apostar por un Goberno coas mans libres para defender o sector en todos os foros.

Entre as propostas para a pesca e o marisqueo acabar co principio de estabilidade relativa e conseguir un reparto xusto das cotas de pesca, defender a soberanía sobre o noso mar e por saneamento das rías e recuperación de bancos marisqueiros, -“ben sabedes en Rianxo e na comarca o emprego e a riqueza que se podía ganar coa rexeneración integral das rías”- e poñer en marcha, en colaboración co sector e a comunidade científica, reservas mariñas e plans de xestións para conseguir que lograr igual ou maior rendemento económico, con menos capturas.

Pontón tamén destacou a aposta por dar valor aos produtos das nosas rías, indicando a trazabilidade como coa DOP Mexillón de Galiza e a xestión dos fondos europeos de pesca para decidir desde aquí as prioridades. “Todo isto é posible se a partir do 12X abrimos un tempo novo no que Galiza teña un goberno que faga valer os intereses do país e se facemos historia de tal xeito que, por primeira vez, unha muller e nacionalista asuma a Presidencia”.

“Temos a oportunidade de abrir portas e ventás e que entre aire fresco na Xunta, a oportunidade de abandonar o inmobilismo dun Feixóo que se esconda tras a pandemia para agochar once anos de fiasco que nos deixan unha Galiza en crise económica, social e política”, indicou, poñendo como alternativa “o proxecto autocentrado, innovador do BNG que aposta por blindar os servizos públicos, como a sanidade ou os coidados das persoas maiores, unha cuestión máis urxente que nunca tras a COVID19”. “Somos a única forza capaz de ofrecer unha solución de futuro con seriedade e con solvencia contrastada, porque somos unha forza de fiar”, alegou.

Aposta polos servizos públicos

O candidato pola provincia da Coruña, Xosé Luís Rivas, tras lembrar as figuras de Castelao, Rafael Dieste e Manuel Antonio, “rianxeiros de nación”, apelou ao seu legado para “soñar outra Galiza” libre das políticas “involucionistas” do PP.

Rivas centrou a súa intervención nos dereitos sociais e na defensa do sector pesqueiro, como fixo o BNG en Bruxelas da man da eurodeputada Ana Miranda co frota co xeito. “Levou unha mochila de Rianxo, que sabe a sardiña e a mar, centro do mundo do xeito, unha arte centenaria respectuosa co medio”.

De cara á cita coas urnas, salientou que a súa candidatura “vai a por todas” co obxectivo de “arrebatarlle o goberno a quen tanto maltrata ao país, para substituílo por un que, baixo a batuta de Ana Pontón, aplique políticas para afianzar os dereitos e as liberdades, para dar benestar social, para poñer en valor todo o noso potencial e converter Galiza nun lugar no que vivir e traballar”.

Rivas comprometeu “políticas valentes que dinamicen a nosa economía, fortalezan os servizos públicos, políticas contra a violencia de xénero, políticas que defendan a nosa industria e aposten por pechar os ciclos produtivos e xerar valor engadido con emprego de calidade, tomaremos en serio o monte e a súa reordenación. Aquí, -dixo,- sabedes do que falo, dos incendios, do lume que vos roubou máis de mil hectáreas”, salientou.

“Nós cumprimos co pobo porque somos pobo e así o demostra o BNG alí onde goberna como aquí en Rianxo con Adolfo Muíños, capaz de sacar adiante vellas demandas da veciñanza como o centro de día, pese aos paus nas rodas da Xunta do PP. A partir do 12 de xullo, Rianxo terá un aliado no goberno galego a favor da veciñanza deste concello e desta comarca”, concluíu.