A recuperación da festa dos Maios de Marín
O BNG quere amosar a súa ledicia polo apoio unánime a nosa moción pola recuperación da Festa dos Maios de Marín. Está claro que a Corporación Municipal de Marín é consciente da deriva cara a desaparición desta festividade tradicional que se remonta varios séculos e que forma parte do noso patrimonio inmaterial galego.
Partimos do feito de que para que non desapareza é decisiva a participación das institucións públicas, e en concreto do Concello de Marín. Pese ao importante traballo de mantemento desta tradición cultural por parte de asociacións como o Ateneo Santa Cecilia, a Asociación Cultural Ronsel de Seixo e a Asociación Cultural de Santomé de Piñeiro botamos en falta unha implicación máis decisiva por parte da actual equipa de Goberno do PP. Velaí esta proposta construtiva do BNG, e da que tivemos que renunciar a varios puntos para conseguir a aceptación da mesma, non por parte do Goberno do PP, senón por outro partido da oposición. O obxectivo da proposta é implicar ao Concello na reactivación da festa dos maios coa colaboración das entidades interesadas e mesmo coa participación dos centros escolares do noso termo municipal. O Concello ten a obriga de velar pola preservación, ten que tomar medidas e implicarse parando o declive da Festa. O Goberno Municipal do PP non pode estar realizando unha política cultural sen un proxecto definido, son as propias institucións públicas as que deben revitalizar a Festa dos Maios de Marín.
Pese a isto o BNG quere lembrar que desde o noso posicionamento político o Goberno Municipal do Partido Popular, encabezado pola señora Ramallo, debería ter en conta estes puntos:
-
Que, conxuntamente coas asociacións interesadas, se realice promocións intensivas, tanto na rúa como cos entes vivos do Concello, sobre a representación da Festa dos Maios de Marín tendo en conta a nosa especificidade.
-
Que, conxuntamente coas devanditas asociacións, se desenvolva unha serie de actividades en todos os centros escolares e institutos do concello para implicalos na Festa.
-
Que, conxuntamente coas asociacións interesadas, se mellore os premios non só o incentivo económico senón, se cadra e entre outras, tamén invitando aos participantes á degustación dalgunha sobremesa típica do período ou de Marín.
-
Que, conxuntamente coas asociacións culturais, se organicen unha serie de obradoiros, charlas prácticas e pedagóxicas para potenciar a difusión dos Maios entre a veciñanza e sobre todo nos/as máis cativos/as.
-
Que esta potenciación non só se circunscriba a Marín e Seixo senón que se recupere en todo o territorio municipal, pois aínda está viva na memoria das xentes do rural.
-
Que por parte do Concello de Marín se trate de recuperar as famosas “carrozas triunfais” que no pasado caracterizaban Os Maios de Marín.
