Nun esforzo por preservar e revitalizar unha peza esencial da historia local, o Bloque Nacionalista Galego (BNG) de Marín presenta unha proposta para a adquisición do edificio Baladrón, unha icona arquitectónica que caeu nun estado ruinoso con 700 metros cadrados distribuídos en catro alturas.

Para consultar o proxecto con máis detalle preme na seguinte ligazón: https://www.calameo.com/books/007363562a06620459e02

Esta iniciativa xorde como resposta á urxente necesidade de preservar o patrimonio histórico e de proporcionar á comunidade de Marín un espazo multi-funcional para o seu desfrute. Tras conversas co propietario, D. Eduard Varela, chegouse a un acordo condicional de venda por 250.000 euros, incluíndo o proxecto técnico necesario para a rehabilitación integral do edificio.

Baladrón, destacado pola súa arquitectura ecléctica e pola súa localización única pechando a alameda, está catalogado como Singular no PXOM Marín. O BNG considera que esta oportunidade non só responde a unha necesidade urxente de infraestrutura pública, senón que tamén é un paso fundamental para fortalecer os vínculos comunitarios coa rica herdanza cultural local.

A proposta do BNG garda coherencia co Plan +Provincia da Deputación de Pontevedra, que destina 1.112.319 euros a Marín para o presente ano. Concretamente, a liña 1 do plan, destinada ao financiamento de investimentos e adquisición de bens inmobles, ofrece a oportunidade de utilizar fondos para a compra do Edificio.

A comunidade de Marín expresou un apoio sólido e entusiasta a través dunha campaña de consulta na que se recolleron 224 enquisas e 480 sinaturas. Os resultados son claros: o 98% considera esencial a preservación do patrimonio histórico, e o 96% respalda a viabilidade de recuperar o edificio para servizos públicos. Entre as opcións preferidas de uso, un 30% aboga por convertelo nunha nova biblioteca pública con salas de estudo, mentres que o 26% favorece a idea de convertelo nun museo.

O BNG vai levar esta proposta ante o próximo pleno, o 8 de febreiro, buscando o respaldo formal do Concello de Marín para a adquisición e recuperación deste valioso Edificio. A visión é clara: transformar un edificio en ruínas que sirva á comunidade e fortaleza o legado cultural de Marín.