O PP rexeita a proposta do BNG de abrir o viveiro de empresas ás iniciativas  empresariais  e comerciais do municipio

O goberno local do PP rexeitou durante o pleno celebrado o venres pasado, a posibilidade de abrir o viveiro de empresas  ao tecido asociativo de Marín e a actividade comercial e empresarial do municipio.

“O PP pretende poñer a disposición dunha soa asociación, sen implantación en Marín, un espazo situado dentro da Zona de Servizos do Porto, mais edificado con capital público, para “a posta en marcha de novas tecnoloxías aplicadas á práctica empresarial e industrial, en materias náuticas e portuarias no Porto de Marín e o seu entorno”, restrinxindo así a posibilidade de que calquera iniciativa, a nivel individual ou colectivo, poida facer uso desta instalación, e limitando a actividade ao ámbito privado, dirixido ademais por unha asociación allea a Marín, e sen contar en absoluto co tecido asociativo comercial e empresarial de Marín”, afirma a portavoz do BNG, Pilar Blanco.

“O PP unilateralmente, sobardando os acordos baseados no Plan de Emprego proposto polo BNG, vincula a creación dun viveiro de empresas á Asociación de Jovenes Empresarios de Pontevedra, restrinxindo a súa actividade a empresas portuarias e á súa industria auxiliar, pechando así a posibilidade de crear un viveiro de iniciativa pública e destinado a todo tipo de empresas e propostas emprendedoras que xurdan dentro do noso municipio”, engade a concelleira nacionalista.

“En ningún momento se tivo en conta a opinión dos demais grupos políticos, e o que é máis grave, tampouco se contou co tecido asociativo de Marín ligado á actividade comercial e empresarial, a pesar de que houbo ofrecementos dende a Asociación Centro Comercial Local Estrela de Marín para impulsar o viveiro ou organizar cursos de formación”. “Esta cuestión ten aínda máis calado despois de ter coñecemento de que a Cámara de Comercio de Pontevedra pretende organizar cursos dirixidos ao comercio e pequena industria”, afirma a edil do BNG.

O PP rexeita a emenda do BNG para abrir o viveiro a todo tipo de empresas de Marín

A pesar da pouca marxe de tempo entre a comisión informativa, celebrada  na mañá do venres, e o pleno, que se celebraba pola tarde, o BNG intentou emendar o acordo para que todo tipo de iniciativas emprendedoras xurdidas no noso municipio tivesen cabida no viveiro de empresas que se emprazará no edificio do Parque Azul, propiedade da Autoridade Portuaria: “Propuxemos que o viveiro fose de iniciativa pública e municipal co obxectivo de crear novas oportunidades de emprego á veciñanza de Marín, contando coa colaboración do tecido asociativo de ámbito municipal e ligado á actividade comercial e empresarial, coa posibilidade de coordinar a posta en marcha do viveiro e da súa actividade de xeito transparente, pero o PP négouse de plano”, finaliza Pilar Blanco.

Marín, 12 de xullo de 2014