O BNG recolle as demandas dos praceiros e praceiras de Marín
Os concesionarios demandan que se elimine definitivamente o dobre sentido en Exército e Mariña e reclaman máis prazas de estacionamento
O Grupo Municipal do BNG de Marín ven de presentar alegacións ao chamado proxecto para o Acondicionamento acceso principal á Praza de Abastos, despois de recoller as demandas dos praceiros e praceiras.
O BNG demanda tamén que durante o período que teñan lugar as obras, estas se realicen fóra do horario de funcionamento da Praza de Abastos para non entorpecer o mesmo.
Reunións coas praceiras e praceiros
A pesar dos nove meses transcorridos dende que o goberno local do PP anunciara a súa intencionalidade de remodelar a entrada da Praza de Abastos de Marín dende a rúa Exército e Mariña, a día de hoxe os traballadores e traballadoras da Praza non recibiron ningunha explicación directa por parte do Concello en relación coas obras e o proxecto a executar. Ninguén do goberno local se prestou a dar explicacións aos afectados máis directos que son os traballadores e traballadoras da Praza, afirma o concelleiro do BNG, Xosé María Vilaboa.
O concelleiro nacionalista, explica que ante o descoñecemento que a gran maioría dos traballadores e traballadoras da Praza nos manifestaron con respecto á intencionalidade do goberno municipal, decidimos expoñer os planos do proxecto, que está en período de exposición pública, no taboleiro da propia Praza, e poñernos a disposición dos praceiros para recoller as súas demandas.
Tras dúas reunións celebradas na propia Praza de Abastos, o BNG puido recoller ás dúbidas e propostas dos praceiros que agora se plasman no documento de alegacións presentadas no rexistro municipal.
Principais demandas
Aínda que o goberno do PP anunciou que non se establecería dobre sentido da circulación en Exército e Mariña, o proxecto segue recollendo esa posibilidade mantendo un deseño da calzada que posibilita que en calquera momento se poida establecer a circulación en ambos sentidos, explica o concelleiro nacionalista.
Demandamos que se elimine de xeito definitivo o dobre sentido de circulación neste tramo, e que se delimiten as prazas de aparcamento, tal e como nos reclamaron os praceiros.
Ademais, e a pesar do declarado por parte da alcaldesa e da concelleira delegada de Comercio, finalmente suprímense varias prazas de aparcamento nunha zona que demanda cada vez máis servizos, polo tanto tamén solicitamos que se estude de novo o deseño para non perder estacionamentos.
Itinerario peonil ou muelle de carga e descarga
O proxecto que pretende o goberno local elimina o muelle da Praza e deseña un itinerario peonil pegado ao edificio que ao mesmo será zona de carga e descarga, sen especificar como se vai compatibilizar a actividade en horario de Praza coa circulación de peóns, explica Vilaboa Ramos. Ademais delimítanse unhas prazas adaptadas á furgonetas e 5m de longo cando hai vehículos de tamaño moito maior que subministran mercadorías á Praza, engade
Polo tanto demandamos que se re-deseñe o proxecto de xeito que esta zona de carga e descarga poidan acceder os distintos tipos de vehículos que dan servizo á Praza de Abastos, que se estableza un horario da zona de carga e descarga adaptado as súas necesidades, e que se recolla a incompatibilidade da zona de muelle co uso de itinerario peonil durante o horario de Praza, finaliza o concelleiro nacionalista.
Marín, 23 de xuño de 2014
